Archive for October, 2007

Tangulia Dube, duniani hapakukustahili!!

 Ni vigumu kuamini lakini ndivyo ilivyo, kuwa mmoja kati ya watu ambao huwa naamini ni wateule walioletwa duniani kwa ajili ya kuifanya dunia kuwa sehemu inayofaa kuishi na hata kupewa hadhi ya dunia, hatunaye tena. 

Namzungumzia msanii, mwanamapinduzi, mpinga ubaguzi na mtetezi wa haki za watu ambao daima wamekuwa wakionekana wanyonge. Namzungumzia Lucky Philip Dube, ambaye alifariki dunia Alhamisi ya Oktoba 18, mwaka huu wa 2007, baada ya kupigwa risasi, akiwa na wanae wawili ndani ya gari lake. 

Nasita kusema kuwa hili limekuwa ni pigo kubwa sana kwa wanamapinduzi, kwani naamini kuwa hili ni zaidi ya ambavyo neno pigo kubwa linaweza kumaanisha sit u kwa wapenzi wa muziki wa rege, na wafuasi wa imani za kirasta, bali kwa wale wote ambao wamekuwa wakiamini katika usawa wa mwanadamu. 

Wengi wetu tutamkumbuka kwa nyimbo zake ambazo kama ilivyo ada ya nyimbo nyingi za rege zenye kuimbwa na wafuasi wa imani za kirasta, zilikuwa ni zenye kubeba ujumbe ambao ni lazima ungeweza kumgusa mtu kwa namna moja ama nyingine. 

Nani asiyezikumbuka nyimbo zake kama Think about the children (1985), Slave (1987), Together as one (1988), Prisoner (1989), Captured Live (1990), House of exile (1991), na nyingine nyingi ambazo zilikuwa zimebeba ujumbe ambao uliweza kuwatoa machozi baadhi ya watu waliokuwa wakizikiliza kwa umakini? 

Lucky Dube, ametutoka duniani akiwa na umri mdogo tu wa miaka 43, huku albam yake ya mwisho kuitoa ikiwa ile ya Respect ambayo ilitoka mwaka jana (2006), ambayo ilikuwa albam yake ya 21 zikiwemo albam 6 alizozitoa katika lugha ya Mbaqanga, na mojaaliyoiimba katika lugha ya kiafrikana. 

Dube, kama walivyo watu wengine wengi mashuhuri duniani, alizaliwa katika mazingira magumu baada ya baba na mama yake kutengana kabla hajazaliwa. Alikulia kwa mama yake ambaye alikuwa akiishi na nyanya wa Dube, katika kitongoji cha Ermelo mashariki mwa Transvaal, eneo ambalo kama ilivyo sehemu kubwa ya Afrika Kusini, lilikuwa limetawaliwa na ubaguzi wa hali ya juu wa rangi. 

Aliwahi kufanya kazi za kutunza bustani enzi za udogo wake na katika umri huo huo wakati akiwa shuleni, yeye na marafiki zake kadhaa walijiunga na kikundi cha kwaya na kuunda bendi iliyojulikana kwa jina la Skyway band. 

Katika umri wa miaka 18, Dube alijiunga na bendi ya binamu yake iliyokuwa ikijulikana kwa jina la The love Brothers, alikokuwa akipenda kupiga muziki wa kitamaduni wa kizulu uliokuwa ukijulikana zaidi kwa jina la Mbaqanga. Katika bendi hii alikuwa akifanya kazi zaidi wakati wa likizo kwani wakati huo Dube bado alikuwa ni mwanafunzi. 

Albam zake za awali mbili alizitoa katika kipindi ambapo lugha ya kiingereza bado ilikuwa ikimpa shida kidogo na baada ya albam hizo (Lucky Dube & Super soul), Dube aliamua kwenda kujifunza zaidi lugha ya kiingereza, bila shaka baada ya kuona kuwa mafanikio yake yako katika muziki na hivyo inabidi awe msanii wa kimataifa, na hilo linamlazimu kujua lugha za kimataifa. 

Ingawa albam yake ya mwaka 1984 aliyoipa jina la Rasta never die, ilielezwa kuwa haikuwa na ubora wa kutosha katika kuirekodi, alifanikiwa kuwakamata mashabiki wa kutosha kutokana na ujumbe uliokuwa unapatikana ndani ya nyimbo zilizokuwa katika albam hiyo. 

Alifanikiwa kutwaa tuzo zaidi ya 20, ikiwa ni pamoja na ile ya World Music Awards, aliyoipaya mwaka 1996 kupitia albam yake ya Serious reggae Business, albam ambayo pia ilimfanya atajwe na watathmini wa mauzo ya muziki huo wa rege kama msanii muuzaji bora wa muziki wa rege barani Afrika. 

Wengi wetu pia tutamkumbuka Dube kama mmoja kati ya wafuasi wachache sana humu duniani wa madhehebu ya kirastafarian ambao walikuwa hawavuti sigara, hawavuti bangi na hawanywi pombe. Mbali ya muziki, Dube pia aliwahi kucheza filamu ya Getting Lucky na pia kushirikishwa na msanii wa filamu John Savage, katika filamu ya Voice in the Dark.

Aidha, Dube pia alikuwa ni mshabiki mkubwa sana wa michezo ya farasi ambapo alikuwa akimiliki shamba la wanyama na mchezo huo, katika eneo la Kwazulu Natal. Yote haya hivi sasa yamekuwa historia, Dube hatunaye tena duniani, baada ya kutwangwa risasi na watu ambao bado Polisi wa Afrika Kusini wanaelezwa kuwa wanaendelea kuwatafuta. 

Aliuawa na watu hao wanaosemekana kuwa walikuwa watatu, waliokuwa katika gari aina ya VW Polo, huku yeye mwenyewe Dube akiwa ndani ya gari lake aina ya Chrysler, akiwa na wanae wawili ambao kwa kudra za mwenyezi Mungu walisalimika katika tukio hilo. 

Kwa hali ilivyo ni kuwa tukio hili lilikuwa limepangwa na kutekelezwa kwa ufanisi mkubwa sana na wahusika wa uovu wa aina hii. Na wakati watu wakisikitika kuwa dunia imempoteza mtu huyu muhimu sana, binafsi ninao ujumbe kidogo ambao ningependa umsindikize. 

Kwa watu wa mataifa bila shaka tutasema kuwa Tangulia Dube. Dunia haikuwa sehemu ya wewe kuwepo kwani dunia hii si ya waungwana.  lakini kwa wafuasi wa muziki wa rege na imani ya kirastafarian tunasema Rasta Never Die

Advertisements

October 22, 2007 at 10:51 am 2 comments

Mtukufu Mwalimu, wanafunzi wako wamekuwa watukutu

the late mwalimu Nyerwrw

Oktoba 14, mwaka 1999, ilikuwa siku ambayo Watanzania hawatoisahau maishani mwao. Siku hii ilikuwa siku ya majonzi pengine kuliko siku zote katika historia ya taifa hili. Ilikuwa siku ambayo tulimpoteza muasisi na baba wa taifa hili tukufu, hayati mwalimu Julius Kambarage Nyerere.

 Nakumbuka wakati taarifa za msiba huo mkubwa zilitolewa na rais wa awamu ya tatu, Bw. Benjamin William Mkapa, nilikuwa maeneo ya stendi kuu ya mabasi ya Ngamiani, jijini Tanga.

Ilikuwa ni kama vile maisha yalisimama kwa muda. Ndege waliojazana katika miti iliyoko katika kituo hicho waliacha kulia, mabasi yaliacha kupiga honi na resi, kila mtu alisimama pale alipokuwa kama kagandishwa, na ninaamini hata mzunguko wa dunia ulisimama kwa muda vichwani mwa Watanzania. Hakika ulikuwa mtu wa pekee. 

Miaka nane baadae, leo hii Watanzania tungali tukibubujikwa na machozi kutokana taifa letu tukufu kuondokewa na kiongozi wake mtukufu, na kubakiwa na viongozi watukutu. Ingawa maisha yangali yakiendelea, ukweli ni kuwa haiyumkiniki mambo si shwari atika mwenendo tulio nao. 

Na hasa katika zama hizi ambapo tumekuwa tukiishi kwa mwendo, ari na kasi mpya, Tanzania inazidi kuwa kama daladala lenye kuendeshwa dereva ambaye kwake yeye mahesabu ya tajiri ndio kitu kikubwa kuliko uhai wa abiria aliowabeba. 

Maisha ya Watanzania hivi sasa yamekuwa yanaandikika zaidi kuliko kutekelezeka. Maisha ya Watanzania hivi sasa yamekuwa ni siasa. Siasa kuanzia kuzaliwa kwa mtu, kukua kwake, kula yake, uhai wake na kila kitu kuhmusu. Maisha ya Watanzania yanazidi kuwa ya maigizo, kuanzia elimu, kilimo, afya na kila kitu.

Uchumi wetu ambao hayati mwalimu Nyerere ulitueleza kuwa hautakiwi kukua katika makaratasi bali uendane na maisha halisi ya wananchi, bado haujaweza kuendana na Mtanzania wa kweli. Kwa kadiri ambavyo takwimu za kukua uchumi zimekuwa zikizidi ndivyo ambavyo maisha nayo yameendelea kuwa magumu kwa kila hali.

Kifupi uchumi wetu bado haujaweza kuwa wa kujivunia kwa wananchi wa kawaida, zaidi ya kwa wale wateule wachache sana ambao wameamua kuishi maisha ya peponi wakiwa hapa hapa duniani. Maisha ya wakulima bado ni duni, wakiendelea na kilimo kile kile cha mwaka 1961, wakati hayati mwalimu Nyerere alipofanikiwa kutupatia uhuru wetu ambao ulikuwa mikononi mwa wakoloni wa Kiingereza. Kilimo chetu bado ni kile kile cha kutoa udongo uliposimama na kuurushia nyuma. Na haionyeshi kama kuna juhudi za kukiboresha zaidi ya hapo. 

Ingawa kuna watu ambao naamini wangekuwa na uwezo wangemwomba Mungu amrejeshe Mwalimu Nyerere, duniani, binafsi siwezi kuombea hilo hata siku moja, maana akija leo hii hatutaweza kumfaidi kamwe. Atazimia na kurejea huko kwa muumba muda mfupi tu baada ya kufika na kushuhudia maovu wanayoyafanya wanae.

 Waliokuwa wakijidai kuwa wafuasi wake wazuri enzi za uhai wake. Wafuasi wake hao hivi sasa wananuka rushwa, wananuka uozo wa maovu na uonevu kwa wananchi waliowapa kura zao ili wawaongoze, wao wakazigeuza kula. Wafuasi wake hao wamegeuka kuwa mabepari wa kutupwa, wenye kutaka sifa za kijinga toka kwa wazungu waliowahi kututawala huku wakiwatesa wananchi wao. 

Chama ambacho hayati mwalimu Nyerere alikiacha kiwe mwanga na kiongozi wa kila kitu katika nchi hii, hivi sasa kimekuwa kinara wa maovu. Kimekuwa chama kinachowaongoza Watanzania kugawanyika makundi kwa makundi. Kimekuwa chama cha kuwagawa wananchi kwa dhana za ukabila na matabaka ya matajiri na masikini. 

CCM aliyotuachia mwalimu, naamini kabisa kuwa kwa sasa haipo na kama ipo basi hii ni remix ya ile CCM ya hayati. Hii ni CCM isiyojali kelele za wananchi walio wengi, wakati ile ya mwalimu ilikuwa inasikiliza hata za wachache. Hii ya sasa ni ya kuwapuuzia Watanzania na kuwaona wote ni wapumbavu na wala si wajinga. 

Kwa hakika yapo mengi, mengi mabaya sana ambayo yamejitokeza katika kipindi hiki kifupi sana. Chui waliokuwa wamevaa ngozi za kondoo wamejionyesha waziwazi. Rushwa hivi sasa watu wanakula bila soni wala aibu. Maisha yamekuwa ailimradi kunakucha na kuchwa tu. 

Kwa ujumla yapo mengi ambayo tunakabiliana nayo hivi sasa ambayo yanatufanya tukukumbuke mwalimi, na kama kuna ambalo unaweza kutusaidia, basi ni kusimama nyuma ya wale wote ambao wameonyesha nia ya wazi sasa ya kuleta mabadiliko kwa taifa letu. 

RIP mwalimu.

October 14, 2007 at 4:19 pm 1 comment

Athman Idd ‘Chuji’; Laana ya Simba au?

Kiungo wa kimataifa wa Tanzania, Athumani Idd, almaarufu kwa jina la Chuji, ambaye alizua tafrani ya aina yake mwanzoni mwa mwaka huu wa 2007, wakati wa usajili baada ya kuvigonganisha vilabu viwili vya Simba na Yanga, bado anaendelea kukumbwa na balaa linalohatarisha uhai wa kipaji chake cha uchezaji soka.

 Mchezaji huyo ambaye alichipukia katika klabu ya Polisi Dodoma, ambaye baada ya sakata lake kuamuliwa na shirikisho la soka la Tanzania (TFF), hivi sasa atalazimika kukaa nje ya uwanja kwa muda wa miezi mitatu baada ya kutaka kumshushia kipigo mwamuzi wakati klabu yake ya Yanga ilipopambana na Coastal Union ya Tanga.

 Ikumbukwe kuwa, toka mchezaji huyo atoke klabu ya Simba na kuhamia kwa watani wao Yanga, hajawahi kufanya jambo lolote la maana kwasababu kipindi hicho chote amekuwa akikumbwa na mikasa ya hapa na pale, mingine ya kujitakia na mingine yenye kuzua uyaya.

Katika moja ya mechi chache sana alizoweza kuichezea Yanga, Athuman Idd, alijikuta matatizoni baada ya kuwanyooshea kidole cha kati mashabiki waliokuwa wakimzomea katika uwanja wa CCM Kirumba, jijini Mwanza.

Hiyo ilikuwa ni siku chache sana baada ya TFF, kuingilia kati na kuuvunja mkataba baina yake na Simba, na hivyo kumuidhinisha kwenda Yanga, baada ya mvutano wa muda mrefu uliomkosesha mechi nyingi kiasi cha kutemwa katika tumi ya Taifa (Taifa Stars).

Ilionekana kama vile kiungo huyo mkabaji na mwenye mapafu yenye kujitosheleza, angerejea katika timu yake kutokana na kile kilichoonekana kutulia kwake, na washabiki kudhania kuwa amekua na amejua nini maana ya kuwa mchezaji maarufu, lakini kumbe haikuwa hivyo.

Siku tatu tu baada ya taarifa za TFF kusomeka magazetini kuwa ametulia, kiungo huyo kumbe alikuwa na yake mambo, na akajikuta tena akiingia katika tuhuma za kumpiga mwamuzi na sasa atakaa tena nje ya uwanja kwa miezi mitatu.

Swali ni kuwa, hivi huyu kijana ana matatizo gani? Ni laana ya kuondoka Simba na kuhamia Yanga inayomtafuna (maana huwa wanasema vilabu hivi ukitoka kimoja kwenda kingine ndio umekwisha), au ni nini hasa kinamkumba?

October 12, 2007 at 9:41 pm 4 comments


Blog Stats

  • 32,107 hits
October 2007
M T W T F S S
« Sep   Nov »
1234567
891011121314
15161718192021
22232425262728
293031