Archive for August, 2007

Msanii wa Bongo Fleva ndani ya Blogu

Wengi wetu tulitarajia na tulijua kuwa ni suala la muda tu, tungeweza kumwona Freddy Macha mtandaoni, lakini ni nani alitarajia ujio wa Ilunga Khalifa? Eh!! Kuna watu tayari wanajiuliza naye ni nani. 

Huyu jamaa ambaye anaringia simu yake ya kamera (sijui ni nzuri kama hii yangu au vipi), kwa jina anaitwa Ilunga Khalifa. ukipenda unaweza kumuita CP au Cpwaa kama vijana wanavyopenda kumwita huko mitaani na ujio wake kwakweli umenisisimua sana. Msanii kwenye Blogu!! Inashangaza eeh!!

Sasa ngoja nikwambie kitu… Ilunga Khalifa, ni mmoja kati ya wasanii kadhaa wa huu muziki wa kizazi kipya, ambao wamefanikiwa ‘kuwashika’ vijana vilivyo kutokana na nyimbo zao zenye mistari ya aina yake.

Si mpenzi sana wa aina hii ya muziki, lakini nilishawishika kusikiliza muziki wake mmoja, baada ya kuiona blogi yake na kuambiwa kuwa ni msanii. Kwa wale vijana wanaoufuatilia sana muziki huu, naamini wanaujua wimbo wake uliowakamata vilivyo, unaokwenda kwa jina la CPwaaa. 

Wakati wasanii wetu wengi hapa nchini wakiwa wanafanya kazi zao katika hali ambayo hata sisi tumekuwa tukiilalamikia kila siku, bilashaka kutokana na elimu ndogo waliyonayo wengi wao, huenda Khalifa, akawa kawafungulia milango wenzake kwa ajili ya kuweza kuchangamana na dunia inayowazunguka. 

Sijui kama wenyewe wanaweza kunielewa kwakweli, ila naamini kwa wale wenzangu na mie ambao tumeshaogelea huku, naamini mnanielewa namaanisha nini. 

Nitazungtumza zaidi kuhusu msanii huyu pindi nikishapata wasaa nikakutana naye na kuzungumza naye mawili matatu. Kwa leo, naomba niwape mwito wa kumtembelea CP, na kisha kumpa mawili matatu katika kijiwe chake. Pia muweze kushuhudia kile anachokiona kupitia kamera yake ya kwenye simu.Bonyeza hapa kumtembelea na kumkaribisha

Advertisements

August 24, 2007 at 12:55 pm Leave a comment

Msaada jamani!!

Leo hii, asubuhi sana na mapema nilipoingia ofisini kwangu, jambo la kwanza kabisa kulifanya ilikuwa kusoma barua nilizotumiwa na wasgirika mbalimbali kama ilivyo kawaida yangu. Moja kati ya ujumbe ambao nilikutana nao ni huu hapa chini kumhusu binti aliyeko pichani, ambao nitauweka kama ambavyo niliukuta.

 

===

Ukimuona kwa sura, ni msichana mzuri mwenye macho ya kuvutia, lakini masikini hana raha ya maisha! Mtoto Sofia James Mwiga (17, pichani)mkazi wa Manispaa ya Tabora nchini Tanzania anaishi kwa mateso kufuatia ugonjwa wa ajabu wa kuvimba miguu hali iliyomfanya ajione mpweke machoni mwa jamii huku akishindwa kuanza shule.


Licha ya baba yake kumtafutia matibabu kwa zaidi ya miaka 10 bado hajafanikiwa kwani kila Daktari anayemfanyia uchunguzi hutoa maelezo kuwa hapa Tanzania hawezi kufanyiwa oparesheni isipo kuwa nje ya nchi ambako kuna Wataalam na vyombo vya kitabibu vya kisasa.

Kutokana na umasikini alionao baba mtu ameshindwa kumsaidia badala yake amebaki akisubiri miujiza ya mungu ishuke pengine atapata mfadhili atakaye weza kumsaidia kupata matibabu hivyo anawaomba wasamaria wema popote duniani waweze kumsaidia kuokoa maisha ya mtoto wake huyo.


Hivi sasa mtoto huyu yupo katika hospitali ya Lugalo, jijini Dar es salaam akisubiri atakayeweza kujitokeza na kumsadia kupata matibabu sahihi nje ya nchi, kwa mujibu wa mdaktari, anahitaji operation ya kuondoa nyama hizo zilizozidi.

cheki anavyoumia

Mungu kama amekupa, basi kumbuka na wenye shida. Naamini kunamtu hapo anaweza kubadili masiha ya msichana huyu kwa uwezo wake mola! namba ya simu ya baba mzazi wa msichana huyu ni +255 753 916690.

Akiwa na jamaa

Nilipomaliza kuusoma ujumbe huo niliwasiliana na mwenye namba hiyo ambaye alijitambulisha kwa jina la Francis Aloyce Mwiga, ambaye ni baba wa wa binti huyo na akanieleza kuwa tatizo hilo lilimuanza mwaka 1998, lakini halikuwa kubwa sana, hadi mwaka 2005 ndipo hali ilipofumuka ghafla na hadi kufikia hali aliyo nayo binti huyo kwa sasa.

Alinipa ruhusa ya kupandisha ujumbe huu katika blogi yangu na ruhusa kwa yeyote atakayeupata kujitahidi kwa kadiri awezavyo kusambaza kwa watu wengine ili binti huyu ambaye ni dada yetu na rasilimali muhimu kwa Taifa la Tanzania, aweze kusaidiwa.

KUTOA NI MOYO JAMANI. MWENYE NACHO HAKIKA NI VYEMA AKASAIDIA WASIO NACHO. MSAADA WENU UNAHITAJIKA KUSAIDIA MAISHA YA BINTI YETU HUYU.

August 11, 2007 at 10:52 am 2 comments

Washindwe na walegee!!

WAKATI mbio za kila mwaka za Mwenge wetu wa Uhuru zikiwa zinaendelea kuchanja mbuga katika mikoa mbalimbali, nikiwa kama mmoja wa Watanzania wanaoamini kuwa ni wazalendo wa kweli kwa taifa lao, nimekuwa mfuatiliaji mzuri wa yanayojiri katika sehemu unakopita.

Nimekuwa nikijitahidi kufuatilia masuala mbalimbali yanayojitokeza katika mbio hizo iwe kwa kupitia vyombo vya habari vinavyoripoti masuala hayo au hata kuwasiliana na marafiki zangu walioko sehemu ambako unapita na kwa ujumla mambo ambayo yamekuwa yakijitokeza ni yaleyale ambayo naamini yameshaanza kuzoeleka masikioni na hata machoni mwa Watanzania.

Mwenge huu umeendelea kuwa unalala sehemu za vijijini kwa kile kinachoelezwa kuwa ni katika kuamsha ari ya uzalendo na uwajibikaji kwa taifa lao miongoni mwa wananchi walioko “gizani” huku pia ukiwa unazindua miradi mbalimbali ya kimaendeleo katika sehemu husika na kuweka mawe ya msingi katika miradi kadha wa kadha.

Nakumbuka kupitia historia ambayo nilijifunza shule ya msingi (maana nilikuwa sijazaliwa wakati huo) kuwa wakati mwenge wa uhuru ulipokuwa unawashwa, mwaka 1961, hayati baba wa Taifa Mwalimu Julius Nyerere alisema kuwa mwenge huo uliwashwa ili uiangaze Tanzania ndani na hata nje ya mipaka yake. Uwamulikie Watanzania ndani na hata nje ya mipaka ya nchi yao na pia kuwamulika kusudi waweze kuonekana (bilashaka na kuchukuliwa hatua) wale wote ambao wenye nia mbaya na nchi yetu.

Kimantiki, ni wazi kabisa kuwa malengo, dhamira nia na madhumuni ya mwenge wetu wa uhuru, yalikuwa ya kipekee na ya muhimu sana kwa maendeleo ya nchi hii na hususan katika kuhakikisha kuwa Watanzania, kizazi hadi kizazi, wanaendelea kujirithisha Uzalendo wa dhati na wa kweli kwa nchi yao. Na ndio maana umaarufu wa mwenge ulikuwa ni wa aina yake pia.

Hata hivyo, katika siku za karibuni, umaarufu huo umekuwa ukizidi kupungua kwa kadiri ambavyo miaka inazidi kusonga mbele na bilashaka hii ikiwa ni kutokana na kuibuka kwa genge la watu ambao wamekuwa wakiutumia mwenge kwa manufaa yao binafsi na kuupaka matope.

Ukiachilia mbali masuala ya kisiasa ambayo yameingilia katika misafara ya mbio za mwenge na hivyo kusababisha malalamiko kutoka kwa watu wa kada mbalimbali na hususan wale wanaosemekana kuwa wapinzani, yapo matendo ambayo yamekuwa yakitendeka wakati wa hafla za kukaribisha mwenge katika maeneo mbalimbali ambayo binafsi yamekuwa yakinipa maswali mengi kuliko majibu.

Miongoni mwa matendo hayo ni pamoja na kushamiri vitendo vya ngono wakati wa mikesha ya mwenge unapokuwa mahala fulani. Ndio!! najua wapo ambao watang’aka katika hili lakini lipo na limekuwa likikua kwa kasi ya ajabu sana katika miaka ya hivi karibuni.

Nakumbuka mwaka 2005, kipindi hicho nikiishi mkoani Dodoma, niliwahi kuwa mmoja kati ya waandishi waliokuwa wakizunguka na mwenge katika wilaya mbalimbali za mkoa huo ambapo moja kati ya matukio yaliyonistaajabisha katika siku ya kwanza tu ya kuwa katika msafara huo lilikuwa la kukusanywa kwa ndoo kadhaa za kondomu katika uwanja ambako mwenge ulilala.

Lakini nilishangaa zaidi baada ya kufanya udadisi kwa baadhi ya watu na kuelezwa kuwa matukio kama hayo ni ya kawaida kabisa. Kwamba yamekuwa yakitendeka sehemu mbalimbali. Toka wakati huo tukio hilo lilinikaa kichwani mwangu na toka wakati huo ambao nimekuwa nikijitahidi kufuatilia kuona kama kuna mabadiliko katika hili au laa.

Cha kushangaza ni kuwa hakuna mabadiliko yoyote. Badala yake idadi kubwa (sio wote), ya watu wanaoshiriki katika sherehe hizo wamekuwa wakithamini zaidi pombe ambayo kuzidi kwake ndo chanzo cha matendo hayo machafu ya ngono hali inayonipa mashaka kuamini kuwa idadi hiyo kubwa hukumbuka kutumia kinga kama nilivyo shuhudia ndoo hiyo moja tu ya kondomu iliyokusanywa kwa wakati huo.

Kwa uelewa wangu pombe ikishafanya kazi kwenye ubongo wa mtu, sidhani kama ataweza kukumbuka kutumia kondomu. Na kwa sababu sherehe hizo hutumika sana pombe kama kiburudisho, hilo ndilo linalo niumiza kichwa katika fikra zangu kwamba huenda asilimia kubwa ya watu wanaoshiriki mbio hizo za mwenge huambukizwa ugonjwa huo hatari wa ukimwi baada ya kupata kileo hicho .

Kwa hali hiyo basi , huenda baada ya miaka mitano mbele kukawa na ongezeko kubwa la waathirika wa ugonjwa huu hatari wa ukimwi kama jamii haitachukua hatua kukabiliana na vitendo hivyo vya ngono zisizo salama vinavyo endekezwa wakati wa sherehe hizo za kuleta maendeleo ya nchi yetu.

Na si kwamba elimu na maonyo ya tahadhari dhidi ya maambukizo ya ugonjwa huo wa ukimwi haitolewi na viongozi mbalimbali katika sherehe hizo bali jamii imekuwa ikipuuza maagizo hayo yanayo tolewa kwa kufanya hivyo kwa kile ninacho dhani ni makusudi wakijua madhara yake .

Tumeshuhudia mara nyingi baadhi ya viongozi wa misafara hiyo ya mwenge na vikundi mbalimbali vya ngoma wakitoa nasaha kwa njia ya nyimbo na mashairi lengo lao ikiwa ni kuhakikisha jamii inachukua tahadhari dhidi ya maambukizi mapya ya gonjwa hili la ukimwi ili kunusuru maisha ya wachache waliokoswa na janga hili.

Wakati umefika sasa kwa jamii kuamua kuchana na tabia hiyo ambayo haina faida kwa maendeleo ya nchi kwa kufumbia macho vitendo hivyo vinashusha hadhi ya maadili ya taifa letu la Tanzania.Na kama tukiamua kwa dhati na moyo mmoja kubadilika nafikili tutaondokana na janga hili sugu la watoto yatima na kupoteza watu ambao ni nguvu kazi ya taifa.

Mbali ya hayo, umefika wakati sasa kwa kila Mtanzania, tukianza na wale walioko katika nafasi zenye ushawishi mkubwa, kuona kuwa umefikia wakati wa kurejesha hadhi ya mwenge wetu wa uhuru. Uwachome wale wanaoudhalilisha na kuwamulikia wale walioko gizani.

August 3, 2007 at 4:06 pm 1 comment


Blog Stats

  • 32,107 hits
August 2007
M T W T F S S
« Jul   Sep »
 12345
6789101112
13141516171819
20212223242526
2728293031