Archive for December, 2006

Tuna UHURU lakini mbona hatuko Huru

Uzuri wa maisha na hasa kwa watu kama mimi ni kuwa falsafa ya KUCHELEWA huwa inatupitia mbali sana ndio maana hatuoni taabu kuanza kuzungumzia mambo ambayo kwa wengine tunaweza kuonekana tulishachelewa kuyazungumzia. Kwanza kuchelewa katika maisha ni nini hasa? Unawahi kwenda wapi katika maisha kwani? Anyway, tuyaache hayo tuingie katika somo la leo.

Hivi karibuni, Tanzania ilisherehekea (Sio kuadhimisha), kutimiza kwake miaka 45 toka ilipojikomboa katika ukoloni wa mwingereza. Kwakweli sherehe za mwaka huu zilifana sana na atakayekataa kwakweli hatunabudi kumwangalia kwa jicho la umakini maana hatutakii mema.

Ndege zilizungyuka angali kwa mbwembwe nyingi tofauti na hata siku tulipopata uhuru. Kulikuwa na idadi ya kutosha tu ya waliohudhuria sherehe zile pengine kuliko hata siku tuliyoutwaa uhuru huo na kwa kweli kulikuwa na kila kitu ambacho hakika kilijiri kwa mara ya kwanza. Hata maandalizi yake yalikuwa tofauti na miaka iliyopita.

Watu safari hii walishirikishwa (sio kushurutishwa?) kuchangia sherehe za miaka 45 ya uhuru wao (ah!! si ajabu lakini maana siku hizi miongoni mwa pati zinazoongoza kwa kuchangiwa michango mikubwa ni zile za kuizaliwa akina fulani) Na watu walichanga, wakachanga weee, hadi mafanikio yale tuliyoyashuhudia kwenye luninga siku ile. Kwa walioweza kuhudhuria au kuona mambo makubwa yaliyojiri siku ile, sinashaka waliondoka na picha ambayo haielezeki kwa ubora na uzuri wake. lakini Je, ni kweli tulionyesha picha yetu halisi?

Hayati baba wa taifa hili ambaye pia ndiye aliyetutoa huko mikononi mwa wakoloni na leo hii tukijiita kuwa tuko huru, Mwl. J. K. Nyerere, alikuwa akiamini kuwa “Uhuru wa mwanadamu ni uhuru ikiwa mtu huyo anakuwa huru dhidi ya Umasikini, Uonevu, Ukandamizaji, Maradhi, Ujinga huku akiwa na fikra za Umoja” Naam, ni imani hii ya mwalimu ambayo leo hii ilinisukuma kukaa na kuanza kutafakari juu ya mbwembwe za Disemba 9 2006 na hatma yetu.

Sote tunajua wazi kuwa kipindi kile Tanzania inapata Uhuru, mbali ya kuwa kwa ujumla nchi ilikuwa masikini sana, hali ya uchumi haikuwa mbaya kama ilivyo sasa ambapo tumekuwa tukishuhudia kuporomoka (Mrema anasema kuserereka) kwa fedha yetu dhidi ya fedha za nje ikiwemo hata Kenya tu ambayo wakati ule wa uhuru shilingi yao ilikuwa sawa na yetu.

Kasi ya umasikini imekuwa ikizidi kuongezeka kwa Watanzania kila uchao na hadi leo hii idadi ya wananchi wanaoendelea kuwa masikini ni zaidi ya mara tatu ya wale wanaoonyesha dalili za kunyanyuka, ukiachilia mbali lile genge la wateule fulani fulani ambao nisingelipenda kuwazungumzia hapa sababu hoja ya kujieleza walikotoa utajiri wao haijajibika mpaka sasa.

Masimulizi ya kukua kwa pato la Mtanzania ambayo yameendelea kuwa wimbo wa kila kiongozi yameendelea kutokuwa na uwiano halisi na maisha ya hao wanaoambiwa pato lao kwa mwaka limekua. Bado wangali wakilala na njaa wengi wao, bado wanaendelea kufa kutokana na kukosa huduma sababu ya kukosa fedha, wapo wanaoendelea kuwa wajinga sababu wameshindwa kulipia masomo yao na wapo ambao ah!! acha tu.

Hivi Mtanzania huyu kwa falsafa ya Nyerere juu ya Uhuru, alikuwa na kipi cha kujivunia katika siku ile, tena cha kusherehekea? Rushwa, amekuwa mdudu ambaye kila anayeingia madarakani anauimba lakini akashindwa kuucheza.

Wangali wapo Watanzania wanaokosa haki zao za msingi sababu ya rushwa, wapo wanaopoteza maisha yao sababu ya ufisadi, wapo wanaokosa hata sauti za kusemea sababu ya rushwa. Uonevu bado ungalipo, Leo hii Watanzania wangali wanachapwa bakora sababu ya kuuliza kiongozi swali. Uhuru uliopo hapo wa kusherehekea ulikuwa upi ikiwa bado uonevu unatawala hapa nchini?

Najua wapo watakaonyoosha vodole na kuhoji huyu mwandikaji wa hapa ana akili kweli? Anyway, hilo si suala langu maana madaktari ndio watakaoweza kusema kuwa ninazo au laa, lakini uwezo wa kufikiri ninao. Hivi tunajua kuwa siku ile wakati mamilioni wakiwa wanasherehekea siku ile, kulikuwa na mamilioni wengine wangapi wako kwenye njaa na mateso makubwa kutokana na kukosa huduma za msingi?

Tunajua kuwa wakati wengine walikuwa kule Uwanja wa Taifa kuna vijana wetu ambao walikuwa hata hawajui cha kufanya sababu ndoto zao za kuendelea na masomo zimekufa baada ya kukosa fedha za kujiendeleza?

Yaani ilikuwa falsafa ile ile ya uswahilini ambayo wanahabari wameipigia kelele weeee mpaka sasa wameamua kujiunga nao baada ya kushindwa kujitenga na kuwarekebisha. Nazungumzia falsafa ya kuchangishana, kuonyeshana ufahari wa shereheni lakini si katika masuala ya maendeleo, mbona walipotoswa wanafunzi pale mlimani sababu serikali haina fedha hatukutangaziwa kuchangishana kidogo kidogo ili kuweza kuwakusanyia fedha za kuwawezesha kusoma?

Ni kweli kuwa tulielezwa mambo meeeeengi sana siku ile ambayo tulitakiwa kujivunia, lakini je yanaendana na umri huo kweli? Na hawa walioko sasa wana mikakati ipi kwa ajili ya baadae maana sio suala la miaka mingine 45 ijayo tuje kuendelea kuambiwa eti taifa letu bado changa, ni kweli lakini hata watoto huwa na ndoto zao na ndoto zao wao huzitekeleza kwa matendo sio kwa maneno na porojo nyingi.

Vifo vitokanavyo na uzazi vingali vikimaliza maisha ya mama zetu, milipuko ya magonjwa ingali ikitesa wananchi wetu tena hata hapo Dar ambapo ndio kila mtu anataka kukaa hapo, kasi ya wasiokuwa na ajira nayo imekuwa ikiongezeka kila siku kutokana na sera mbovu katika mfumo wa elimu na mfumo mbovu katika kuandaa vijana kwa ujumla na kuwapa uwezo wa kulitumikia taifa lao. Huo uhuru wetu katika hali kama hii tunaweza kuuthamanisha kwa kiasi gani?

Nijuavyo mimi ni kuwa thamani ya kitu chochote ni pale kinapoonyesha matunda mazuri kama ambavyo nilitarajia kwa upande wa thamani ya uhuru wetu. Kwamba kwa kadiri ambavyo nchi ingekuwa ikipiga hatua za haraka haraka kimaendeleo kwakuwa tuna kila kinachohitajika kwa ajili ya kuendelea, basi ndio na uhuru wetu pia unazidi kuwa na thamani. LAkini tunachokifanya sasa ni kushusha thamani kama tulivyofanya kwenye fedha yetu.

Badala ya kuendelea tumekuwa ama tumesimama palepale au tunarudi nyyuma zaidi. Uhuru wetu umekuwa ni kwa manufaa ya wachache kuwaibia wengi, wachache kuwaonea wengi, wachache kudhulimu haki, fursa na maslahi ya wengi. Uhuru wa namna hii si uhuru, Uhuru wa namna hii hauna manufaa na wala hauwezi kusherehekewa kwa dhati na mbwembwe za kila aina na badala yake siku hiyo pengine ilitakiwa kutumiwa kwa ajili ya kuhitimisha labda zoezi la kukusanya kura za maoni za wananchi kuhusu mfumo bora wa elimu, mfumo bora wa kutokomeza rushwa na kadhalika.

Wakati mvi zikiwa hazijatapakaa vichwani mwetu sababu ya uzee, ni vyema basi sisi tukajipanga vyema na kikamilifu kwa ajili ya kuhakikisha kuwa tunauthaminisha uhuru wetu kwa kuufanya uendane na mamilioni ya Watanzania na sio genge la wateule wachache na vibaraka wao.

Alamsiki

Advertisements

December 29, 2006 at 2:38 pm 2 comments

KUMRADHI……KUMRADHI……KUMRADHI

Wapendwa wasomaji wangu, napenda kuwaomba radhi kwa usumbufu wowote mtakaoupata katika kipindi cha siku mbili tatu pindi mtakapokuwa mkitembelea blogi hii. Kuna matengenezo ya kiufundi yenye lengo la kuboresha mambo katika kijiwe hiki ambayo yanaendelea. Matengenezo haya yatakamilika ndani ya siku mbili. Nawashukuru sana kwa ushirikiano wenu na nawaomba tena radhi kwa usumbufu mtakaoupata katika siku hizi mbili.

December 28, 2006 at 5:27 pm 1 comment

Sababu nakupenda rais wangu

Ni kwasababu ninakupenda mheshimiwa Raisi wangu ndio maana kwakweli nilijitahidi sana kukaa kando ya karedio kangu nikisikiliza jinsi ulivyokuwa “unachemka” kushusha mistari iliyokuwa imejaa vina juu ya kile kilichojiri ndani ya siku zako miatatu sitini na ushee hivi ukiwa katika makazi yako ya Magogoni.

Inawezekana sikukuelewa sana au kuendana na kile ulichokuwa ukituambia kwa maana ya kuwa na mtazamo wa kile hasa kilichokuwa nafsini mwako ulipokuwa ukichemka pale Kilimani, lakini kwasababu nakupenda Rais wangu, angalau niliambulia maneno mawili matatu hasa pale mwishoni mwishoni uliposema “Tukiwaunga mtazidi kuchemka” na kisha wakati unatoka ndani ya jumba lile, nasikia Vijana au skauti wa Chama wakawa wanakuimbia kawimbo kazuuuri, eti “Tukupambe maua”

Inawezekana usinielewe kwakweli, lakini kwasababu nakupenda sana mheshimiwa Rais wangu, nisingelipenda “Tukupambe” maana tutakuumiza sana. Ndio, tutakupamba kwa lipi mheshimiwa? Kwa shada la maua yaliyojaa miiba ya dhiki na ufukara unaoendelea kututesa? Kwanini tukupambe kwa mapambo ya kukuumiza mheshimiwa?

Na ukumbuke pia kuwa shada hili utavishwa ukiwa kizani, hali ambayo huenda ikakuumiza sana kwasababu lenyewe tayari lina miiba ambayo ni hatari na yenye sumu, akikosea mtu na kukuvisha vibaya sababu ya kiza huoni kuwa tutakuwa tumesababisha mengine?

Ni kwasababu nakupenda sana mheshimiwa raisi wangu ndio maana nimeona nikupongeze kwa kutaka “Tuwaunge mkono ili mzidi KUCHEMKA” sababu umekuwa mkweli zaidi ya tulivyotarajia kwakweli. yaani mmechemka kweli kweli katika kipindi hiki, lakini sidhani kama uungwaji mkono mnaotaka utakuwa makini kama mlivyotarajia.

Tutawaungaje mkono mheshimiwa Rais tukiwa gizani, operesheni hiyo haiwezi kuwa na matunda mazuri kabisa, sana sana itakuwa ya kuwaumiza maana hamna atakayekuwa anajua afanyacho huko kwenye giza zaidi ya kuwa tu naye kachomeka mkono wake hujui una sindano yenye dawa nzuri ya kutibu au laa.

Na kwakweli mheshimiwa Rais, kwasababu nakupenda kiongozi wangu ninaona ni vyema nikueleze kuwa ikiwa hali itaendelea kuwa hivi, mtazidi “Kuchemka” zaidi ya hapo hasa mlioko katika jiji la Dar es salaam, maana mtapoozwa na nini ikiwa hata nguvu ya kusababisha viyoyozi viwapooze mnapochemka haipo?

Ni kwasababu ninakupenda kiongozi wangu niliyekupigia kura (au kukupikia kula?), ndio maana ningelipenda kwakweli ikiwezekana tujiulize pamoja mambo machache sana yafuatayo:-

Kweli unania tukuunge mkono kwa ajili uzidi kutusokomeza kizani kwa kisingizio cha kuwa tulishawekwa uelekeo wa kusukumiwa huko toka nyuma? Yale makali yako wapi mheshimiwa? Ya kutowaonea aibu wale wote ambao wana nia ya kuturejesha enzi za kutawaliwa? Inamaana mkono umevunjika ndio maana kweli umeshindwa kuwakamata hawa jamaa zetu wa Richmond, ambao kila kukicha wamekuwa wakikuchokonoa kwenye macho?

Inamaana kuwa mikono imevunjika ndio maana mnashindwa kuidaka shilingi yetu kiasi kwamba kila kukicha inazidi kuserereka, kama alivyotamka mzee wa Nji hii, Bw. Mrema? Ina uzito gani shilingi yetu kiasi cha kushindwa kuishikilia walau pale ilipokuwa hadi kuiacha iendelee kuzama?

Kilimo chetu badi kimeendelea kuwa kile kile cha kuchimba udongo hapa na kurudisha nyuma, kilimo cha miaka nenda miaka rudi, kile kile ambacho ulikipigia kelele sana kuwa utakifanyia maboresho na nilitarajia kwakweli hiki nacho kingepewa semina elekezi ili kibadilike kiende mbele kwa kasi, nguvu na ari yako, sasa mbona bado tuko pale pale? Au kime-tuchemsha tumeshindwa kukigusa?

Inawezekana kabisa kuwa umesahau kidogo baadhi ya ahadi zako, na kwakuwa nakupenda sana mheshimiwa Rais wangu, nitaomba nikukumbushe juu ya ahadi yako wakati ule wa kampeni, ahadi ya kupambana na rushwa. Mbona sijawasikia wale vigogo waliotajwa katika makabrasha mbalimbali kuwa japo wameopandishwa kizimbani na kusomewa tu mashitaka?

Na wale wauza unga ambao walizua mjadala mkubwa sana Bungeni hivi wameishioa wapi? Si ninakumbuka kuwa ulituambia umeshapewa majina yao mheshimiwa? Maana hatujatajiwa hata kutajiwa kuwa ni akina fulani na fulani. Au kutoka awamu ya tatu mlirithi tu tatizo la umeme na ile sera ya Uwazi na Ukweli hamkuona umuhimu wake?

Ni kwasababu ninakupenda kwakweli mheshimiwa Rais wangu, ndio maana napenda nikukumbushe juu ya kurejesha kale kautaratibu ka awamu iliyopita, kautaratibu ka kila mwezi kutuambia walau kuwa mmekusanya nini mwezi huo na mkatumia katika nini na nini.
Na ni kwasababu ninakupenda mheshimiwa Rais wangu, ndio maana nimeona niishie hapa leo ila nikaribishe wananchi wako wengine nao waelezee mapenzi yao kwako.

Mungu Ibariki Afrika, Mungu Ibariki Tanzania, Mungu Tubariki sisi sote

December 22, 2006 at 3:17 pm Leave a comment

Siku chache baada ya Moto wa Mwanjelwa


PICHANI: ni mabaki ya ndege aliyokuwa amepanda mheshimiwa Akukweti baada ya kupata ajali katika kiwanja kidogo cha ndege jijini Mbeya.

Siku chache baada ya moto uliounguza “mikoba” ya waheshimiwa fulani fulani pale Mwanjelwa, na mali zenye thamani ya mamilioni ya shilingi za Kitanzania kwa baadhi ya wafanyibiashara, akaja Waziri wa Nchi Ofisi ya Waziri Mkuu anayeshughulikia Bunge, Mheshimiwa Juma Akukweti, si akaja Mbeya kuona ukubwa wa madhara yaliyotokana na moto huo na kisha kuwapa pole waathirika wa janga hilo!!!

Alipokuwa anataka kuondoka siku hiyo jioni hali ya hewa ikakataa, haikuruhusu apae na ka-ndege kake, akalazimika kuondoka alfajiri ya kesho yake yaani siku ya Jumamosi ya tarehe 16/12/2006. Kwa bahati mbaya sana akakumbana na dhahama la aina yake, ka-ndege kake kakashindwa kumudu kuruka, kakaenda kuvamia nyumba za wakazi zipatazo tatu na kulipuka.

Mungu epushia mbali, mheshimiwa akanusurika japo alipata majeraha yenye kumpa maumivu makali hasa sehemu za kichwani, na yeye na timu ya waliokuwa kwenye ndege hiyo wakawahishwa hospitali ya rufaa ya mkoani Mbeya kwa matibabu.

Kweli uswahilini noma, unajua wazushi wakaanza kudai huko mitaani eti jamaa hakutoa pole bali kuwabeza waathiurika wa moto ule kwa kuwaambia “Tulishawaambia mhame hapa lakini”, kwahiyo?? Huku uswahilini wanadai eti ajali ilitokana na chuki za wakazi aliowapa ukweli kuwa walishaambiwa wahame hawakusikia ndio maana moto ukawafanya kitu mbaya.

Mungu ailaze mahali pema peponi roho ya mwandishi mwenzangu Theresia Nyantori, wa idara ya Habari na Maelezo (au porojo?), aliyepoteza uhai wake katika ajali hiyo.

i{content: normal !important}i{content: normal !important}i{content: normal !important}

December 16, 2006 at 1:55 pm 4 comments

Mbeya, Kunani paleeee, mbona kila kitu kinawaka?



Ilianza katikati ya wiki kama masihara vile, wakati woko kuu na kubwa mjini Mbeya na lililo maarufu pia lijulikanalo kwa jina la Mwanjelwa lilipowaka moto  na maduka yanayokadiriwa kufikia 500 hivi, (Hata city hawana uhakika maana yalikuwa yakiibuka kila uchao bila hata vibali), na mali zinazokadiriwa kuwa na thamani ya zaidi ya bilioni tano zikiteketea katika moto huo.

Siku hiyo hiyo katika eneo la Iyunga, kilomita zaidi ya tano toka Mwanjelwa, noto ulilipuka yalipo maghala ya Cocacola. Na katika eneo la Mama John, kama km moja na nusu toka mwanjelwa, watoto wawili walipoteza maisha kutokana na hitilafu zilizotokana na umeme.

Ajabu sasa ni siku ya pili yake, ambapo jamaa wanaosadikiwa kuwa na asili ya kabila la Ukinga, eti walikuwa wakilia sio kwa kuunguliwa na mali zenye thamani ya mamilioni ya fedha, bali kwa kuunguliwa na “mikoba” yao. Ama kweli vilio hutofautiana. Wengine wanalilia fedha na mali zao walizokuwa wamefungasha kwa ajili ya wateja wa krismass, wengine wanalilia Mikoba yao iliyoungua!!! Ni vituko Uswahilini.
Ajabu sasa i{content: normal !important}i{content: normal !important}i{content: normal !important}

December 16, 2006 at 1:40 pm Leave a comment

Kuelekea nchi ya ahadi

www.fikiri.wordpress.com

Kumeibuka kijiwe kipya, ukumbi mpya wa fikra na mawazo ya kimaendeleo, dimba la mawazo na mitizamo, uwanja wa majadiliano. Kijiwe hiki kimeanza kwa mbwembwe kidogo, kikiwa na ujumbe wa kuelekea nchi ya ahadi.

“Ikiwa tuna kila kitu kwanini Tanzania isiwe nchi ya ahadi? nchi ya maziwa na asali?

KARIBUNI kijiwe cha KUFIKIRI

December 5, 2006 at 6:33 pm Leave a comment

Siku ya UKIMWI duniani na uzinduzi wa kondomu zeny…

Siku ya UKIMWI duniani na uzinduzi wa kondomu zenye harufu ya ndizi!!!

Jana ilikuwa SIKU YA UKIMWI duniani, siku ambayo mamilioni ya watu duniani huungana katika kutafakari, kutathmini, kupanga na kupangua masuala mbalimbali yenye kuhusiana na ugonjwa huu.
Ni siku ambayo hata hivyo ushiriki wa wale wenye kuishi na gonjwa hili umekuwa duni kulinganisha na umuhimu wa ushiriki wao.
Na pale ilipotokea wachache wakashiriki hasa kwa nchi kama yangu ya Tanzania, basi imekuwa si kwa lengo la kuwafanya watoe kilio chao kwa ajili ya dunia kuweza kuwasaidia, bali imekuwa ni kwa lengo la kuwawezesha baadhi ya wahuni fulani fulani kuwatumia kwa lengo la kujipatia fedha za kununulia mashangingi mapya kwa kisingizio eti kuweza kufika vijijini kuwafikia haathirika zaidi ambao si rahisi kufikiwa (mlishawafikia wangapi mbona hamtuambii?)
Ni siku ambayo imekuwa ikiadhimishwa kwa miaka kadhaa sasa, lakini hali halisi haionyeshi kuwa imekuwa ikiboreka kwa maana ya kuwa walau na afueni dhidi ya madhara ya ugonjwa huu.
Soma takwimu zenye kuhusiana na ugonjwa huu na athari zake Duniani kwa ujumla hapa, huku pia takwimu za ugonjwa na madhara yatokanayo na ugonjwa huu katika nchi za Afrika hususan zilizoko kusini mwa jangwa la Sahara zikiwa si zenye kuonyesha matumaini ya kuridhisha. Taarifa zingali zikionyesha kuwa sehemu hii ya Dunia ndio ambayo imeendelea kuathirika zaidi pengine kuliko sehemu nyingine za Dunia.
Naam, nilikaa mahali, nikifuatilia kwa ukaribu sana karibu kila kilichokuwa kikifanyika katika siku hiyo, iwe kwa kuona ana kwa ana, kwa kusikia au hata kusoma na kwakweli kulikuwa na juhudi kubwa sana zilifanyika na zikawa na matunda katika kupashana habari kuhusiana na matukio hayo, lakini unajua nini ndugu yangu!!
Kama nilivyotarajia, longolongo zilikuwa nyingi zaidi kuliko ukweli. Yaliandaliwa matamasha ya kila aina, kuanzia ya kuzindua kondomu mpya mpaka yale ya kuonyesha ugonjwa huo unavyoenea. Zikachezwa na picha kibao kuhusiana na siku hiyo (Samahani sana dada Chemi, utanisamehe, najua lengo lako lilikuwa zuri tu kupitia filamu yenu) lakini kwangu mimi sijui kama kuna lililoniingia hapo.
Kwanza kabisa ni jina la siku yenyewe SIKU YA UKIMWI. Ni jina ambalo wenye lugha zao wangesema kuwa liko “so general”. Lilitakiwa kuwa wazi zaidi kuwa ni siku ama ya kupambana na ongezeko la maambukizi ya ugonjwa huo, siku ya kukaa pamoja na yatima watokanao na janga hilo au vingine vyovyote ilimradi ijulikane wazi kuwa ni siku kwa ajili ya nini. Lakini kwa SIKU YA UKIMWI tu!! hapana haitoshi
Hivi mnajua kuwa kuna watu ambao huitumia siku hii kwa ajili ya kufanya maambukizi mapya, ndio! Ni siku ya UKIMWI, iwe unasambaza au unaelimisha watu kuepuka maambukizi mapya haijalishi, nyote ni siku yenu hiyo, midhali tu mnajihusisha na gonjwa hilo.
Wapo vigogo ambao naamini kabisa hiyo jana walizungumza mpaka mishipa ikawatoka, jasho likawatiririka wakijitahidi kuonyesha wanavyopata uchungu kuona yatima wakiongezeka, lakini walipotoka hapo wakakimbilia mahali kwenda kuongeza idadi ya wanaoambukizwa, tena baada ya kuwahonga hela walizopewa kwenye bahasha ya khaki baada ya risala yake ndeeeefu na ya kinafiki. Mchana ana uchungu na usiku ndio hivyo tena.
Ukiangalia taarifa zilizokuwa zimejaa kwenye magazeti, redio, luninga siku hiyo, zote zilionyesha kiasi gani jamii nzima kwa ujumla ilivyo na udhaifu katika harakati za kukabiliana na ugonjwa huu. Nyingi zilikuwa zile za Kiongozi fulani kasema…, Asasi fulani imedai…, Waathirika waongezeka…. Yatima nao sijui wamefanya nini……. Yaani blah blah kibao.
Hiyo jana sikuona gazeti hata moja ambalo lilikuwa na kile wanaita wenye lugha zao “Exclusive Interview” labda na mgonjwa fulani aliye mahututi katika hospitali fulani au nyumbani kwake kijiji fulani akieleza kwa undani labda namna alivyorubuniwa na kiongozi fulani hadi kuambukizwa ugonjwa huo, au namna alivyorubuniwa na dereva wa lori sijui lipitalo Manyoni kwenda Burundi, hadi akamwambukiza.
Sikuona mahali au kazi fulani ya mwandishi ambaye aliandika kwa ufasaha na kwa namna ambayo aliyoyaandika yangewavuta viongozi kujitokeza kupima afya zao na kisha kuweka hadharani majibu yao. Wala hakukuwa na mahojiano na yatima wa eneo fulani wakielezea namna ambavyo fedha wanazotumiwa zinaishia kwa watendaji kadha wa kadha kabla ya kuwafikia wao.
Hivi ni chombo gani hiyo jana kiliamua kutuma japo mwandishi wake mmoja kufuatilia kama mamilioni ya asasi fulani waliyoyapata toka kwa wahisani kama yaliwafikia kweli hao walengwa na yakawanufaisha? Sana sana walichokifanya ni kile kile tulichozoea.
Asasi fulani imetoa msaada kwa yatima wa kijiji fulani au kituo fulani cha kulelea yatima watokanao na ugonjwa huo. Kwanini msifuatilie kujua kama kiasi kilichogawiwa huko kinaendana walau na kile kiasi walichochangisha au kumkamua mfadhili fulani?
Na serikali nayo ilisema nini vile katika siku hiyo zaidi ya kile watoto wa mijini wanaita longolongo (usanii uliozoeleka ambao umekuwa hautekelezwi). Walitoa matamko kadhaa ambayo ukiyaona mengine yanatia walakini na kuzua maswali kuliko majibu.
Hivi hamjasikia kilio cha wananchi kuwa wamegeuzwa migodi?
Hamjui kuwa waathirika wamekuwa wakifanywa miradi ya baadhi ya watu na wamenufaika sana kupitia migongoni mwao? na hali hii mtaiacha hadi lini? Kwanini msitoe tamko la kuwa mmeweka utaratibu wa kukagua hesabu za asasi hizo na wawe wanatoa taarifa zao za makusanyo (sio mapato ni makusanyo) na matumizi yao? Au kwasababu nanyi wengi wenu mmekuwa sehemu ya wanaowafanya waathirika miradi?
Kwa ujumla yanayofanyika katika suala hili ni mchezo wa kuigiza zaidi kuliko mapambano dhidi ya ugonjwa wa UKIMWI. Na ndio maana haishangazi kuona kuwa hadi sasa kumekuwa na nguvu zinazokinzana katika matumizi ya mipira ya kondomu kama kinga dhidi ya maambukizi mapya. na wanao kinzana ni wataalamu ambao tunatarajia kuwa wawe na suluhisho muafaka katika janga hili.
Kuna mengi ambayo tunaweza kuyazungumza kwakweli, mengi kuliko vile ambavyo mtu anaweza kutarajia, lakini ni vyema tu tukaelezana kuwa, kwa mfumo huu tulio nao hivi sasa, madhara ya janga hili yataendelea kukua na kuongezeka kila kukicha kama hatutafanya juhudi za dhati na za makusudi katika kubadilisha taratibu zetu za kulikabili janga hili, ikiwa kweli tuna nia ya kukabiliana nalo.

December 2, 2006 at 10:05 am 2 comments


Blog Stats

  • 32,107 hits
December 2006
M T W T F S S
« Nov   Jan »
 123
45678910
11121314151617
18192021222324
25262728293031