Archive for June, 2006

Makamba!! Yaani ni kaaazi kweli kweli

Sijui ni kwasababu sisi wengine tulizaliwa na matatizo ya kuona mambo kinyume au ni kwanini hasa lakini haya yanayoendelea kujiri katika awamu hii ya Uongo-Zii wa awamu ya nne ni kizungumkuti tu. “Yaani ni kaaaazi kweli kweli” anajisemea’ga’ Seki wa Chanel 5

Niliposikia juu ya uteuzi wake, kwakweli nilijua tu kuwa mengi yanakuja, na kwa yakini naamini hata hiki ambacho tumeshakishuhudia ni rasharasha tu, mvua zenyewe zingali zaja.

Nazungumzia uteuzi wa Mgosi, Yusuph Makamba, ambaye ndani ya muda usiozidi siku kumi amelamba ulaji wa haja tu, baada ya kuteuliwa kuwa Mbunge kupitia zile nafasi kumi ambazo mkubwa yeyote wa nchi anapewa mamlaka ya kujaza “washkaji zake” anaoona kuwa uwepo wao katika Bunge, huenda ukasaidia katika mambo fulani fulani hivi (nadhani hata kuwafanya wengi wasilale ni muhimu pia)

Katika muda huo huo, jamaa akaukwaa na ukatibu mkuu wa Chama dume, Chama kilichoshikilia Utamu….ah samahanini wajameni, Chama kilichoshika Hatamu, katika siku ambayo chama hicho kilifanya mkutano wake wa mabadiliko…ah samahani tena, mkutano wa uchaguzi wa mwenyekiti mpya.

Kwa wanaomfahamu luteni huyu mstaafu ( na ninaamini wakazi wa Dar wengi wanamfahamu), watakubaliana nami katika yafuatayo: Kuwa Makamba, ni mmoja kati ya viongozi wazuri sana tulionao hapa nchini, maana kila mmoja anavigezo vyake vya uzuri na ubaya wa kitu. Lakini pia watakubaliana nami kuwa mshkaji, ambaye ni mtoto wa mjini kweli kweli, ni mmoja kati ya viongozi wasanii ambao Tanzania imewahi kuwa nao.

Dakika chache sana baada ya kusikia uteuzi wake kupitia kituo kimoja cha redio, nilipoingia mtandaoni, nilikutana na marafiki zangu kadhaa ambao wako ughaibuni, kila mmoja alisisimkwa kusikia habari ya uteuzi huo, lakini kila mmoja alihoji: “Ulizingatia vigezo gani hasa”unajua niliwajibu nini? Niliwajibu kuwa uteuzi huo kwa dhati kabisa, umezingatia mwelekeo ule ule: Ari Mpya, Nguvu Mpya na Kasi mpya.

Kulikuwa na maswali kadhaa ambayo wengi wa waliozungumzia juu ya uteuzi wake kuwa mbunge, waliyauliza au kuyatafakari ikiwa ni pamoja na jitihada ambazo jamaa ameweza kuzifanya ili kuhakikisha kuwa Undugu baina ya Kipindupindu na wakazi wa jiji la Dar, unaisha.

Hapo hujazungumzia ongezeko la makahaba ndani ya jiji lake, hujagusia kuenea kwa mimaji michafu, hujazungumzia kodi za ajabu ajabu wanazotozwa wafanyibiashara wa hapo na wala hujazungumzia mengine mengi tu ambayo hata kina Ndesanjo waliyaacha yakingali yanafanyiwa upembuzi yakinifu.

Uteuzi huu ndio ukanirejesha katika swali ambalo nimekuwa najiuliza mara nyingi: Hivi uteuzi wa watu wa kujaza nafasi zile kumi unazingatia vigezo gani?, au ni kwa yeyote ambaye “Mshika Utamu” mkuu akimtunuku basi anamsogeza? na kwa kasi hii si ipo siku tutakuja kukuta “Mshika Utamu” mkuu kajaza “Tu-vitegemezi Twake” kumi na kutupa usaidizi kwenye ulafi kwakuwa tu ana mamlaka ya kutumia nafasi zile apendavyo yeye?

Hivi ingekuwa vipi kama tungesikia kuwa Mshika Utamu” mkuu angemwingiza mtu kama Mbowe ndani ya uteuzi huo? na je, angemwingiza profesa Shayo ingekuwaje? Je, angetoa nafasi moja kwa mwanafunmzi toka taasisi za elimu ya juu, mmoja akatoka kwenye kundi la wanaoishi kwa matumaini, na nafasi nyingine kwa yule mkulima aliyechukua fomu ya kuwania Urais mwaka 1995, ingekuwa vipi?

Siku moja kabla sijaandika makala hii, nilipokuwa safarini mahali fulani, ndani ya gari kuna jamaa walikuwa wanajadili suala hilo hilo, na mmoja wao akadai “Nadhani JK ana mpango wa kukamilisha safu ya usanii katika serikali yake” Nilimtizama jamaa mara kadhaa lakini nilipotafakari sana nikaona alikuwa na mantiki. Alikuwa na mantiki sababu mgosi ni mmoja kati ya viongozi ambao anaweza kukupa jibu kuhusu jambo fulani, jibu ambalo ni la kisanii kweli kweli.

Na ndipo hapa ambapo najiwa na fikra kuwa pengine Mshika Utamu mkuu ameona kuwa ndani ya jumba lile jipya wanalotumia pale Dodoma, huenda waheshimiwa wakawa wanalala kwa kasi mpya, tena usingizi wa Viwango na Spidi mpya pia, kwahiyo apelekwe mtu ambaye atakuwa akiwachekesha chekesha wahishimiwa wasilale wakapitiliza. Ndio! Kwani zaidi ya hapo ni kipi kikubwa sana ambacho kimemfanya aonekane katika kujaza nafasi hiyo? Ukongwe? Utiifu? Uadilifu? Uwajibikaji? Kampeni? au nini hasa?

Na sasa unaambiwa jamaa anakuwa: Mkuu wa mkoa wa Dar es salaam, Mbunge wa Kuteuliwa na Katibu Mkuu wa Chama kilichoshika Utamu. Ndio maana yake ati, nimeshangaa sana hata katika uteuzi wa mabalozi hakukuwa na hata ……….? Charahani labda unisaidie kwanini

Tibindiize ndima mghoshi

Advertisements

June 27, 2006 at 5:08 pm 3 comments

Watalii wazalendo



Inawezekana kabisa hata Mwaipopo ambaye ni kwao hajawahi kufika, lakini mimi mgeni nimepatembelea. Namaanisha kwenye kivutio kimoja wapo cha utalii kati ya vingi ambavyto viko Mbeya. Hicho ni Kimondo ambacho kinapatikana wilaya ya Mbozi mkoani Mbeya, ambacho naamini wenhi wetu tulijifunza wakati tuko mashuleni.

June 23, 2006 at 6:45 pm 2 comments

Ni kweli Prof. Charles Bwenge, lakini……….??

Sijui ni wasomaji wangu wangapi ambao ni marafiki wa Profesa Charles Bwenge, lakini naamini huenda wapo na kama wapo basi naomba wanifikishie ujumbe huu kwake, kwamba “Kijiji cha Wana-Blogi wa Kitanzania kinamhitaji sana katika makazi yao kwasababu tayari nyumba yake imeshaandaliwa ikiwa na kila kitu ndani yake, anachotakiwa kufanya yeye ni kuhamia tu basi”

Profesa Charles Bwenge, ni mmoja kati ya waandishi ambao nimekuwa nikiwahusudu sana kwa kazi zao. Amekuwa akiandika sana katika gazeti la Rai na mara nyingi, nimekuwa nikisoma kazi zake. Ingawa kuna kazi zake nyingi sana ambazo ningeliweza kuzizungumzia, kwa leo napenda niizungumzie zaidi kazi aliyoaiandika katika gazeti hilo toleo namba 661, yenye kichwa cha habari “MAKAO MAKUU YA SERIKALI YA TANZANIA YAKO WAPI, DAR ES SALAAM AU DODOMA?”

Katika makala yake hiyo, Prof. Bwenge, anachagiza makala yake kwa maelezo aliyoyakuta katika tovuti ya Tanzania, kuhusiana na kile kinaitwa MJI MKUU ambapo ananukuu maelezo toka katika tovuti hiyo yakisema “Ukiwa na idadi ya takriban wakazi 300,000 (1998), mji wa Dodoma ulioko umbali wa km 309 magharibi mwa Dar es salaam, ndio makao makuu ya siasa na utawala. Dar es salaam ni mji mkuu wa biashara na uchumi”

Maelezo hayo kutoka katika tovuti ya Serikali, yanampa prof. Bwenge maswali kadhaa kubwa likiwa “Kama ndivyo mheshimiwa Kikwete na Serikali yake wanafanya nini Dar es salaam?” Swali ambalo naamini si tu kuwa limedumu katika vichwa vya Watanzania, bali pia kuwa linaulizwa kwa muda wa miaka nenda rudi sasa.

Pengine tu nami naweza kuongeza maswali kadhaa kwa Serikali zilizotangulia na hii ya Ari, Nguvu na Kasi mpya, kwamba “Mlichaguliwa kwa ajili ya kuwaongoza waliowachagua au kwa ajili ya kupata uhalali wa kusimamia biashara zenu na vitega uchumi vyenu vilivyoko ndani ya Mji Mkuu wa biashara na uchumi?”

Nimalizie tu kwa kumwambia Prof. Bwenge kuwa, ukumbi wa majadiliano katika magazeti yetu bado ungali finyu sana, na hili linasababisha maswali ya muhimu kama hayo kutokuwa na uwanja mpana wa kujadiliwa kwa uwazi (sana sana watu watajadili vichwani mwao na kwenye vikao vya stuli ndefu), lakini ukija huku kwenye Blogi, utakuwa umewatendea haki zaidi wasomaji wako kwa maana utawapa mwanya wa kujimwaga kwa kadiri watakavyo kujadili miswada muhimu kama hiyo.

June 9, 2006 at 10:36 am 3 comments


Blog Stats

  • 32,348 hits
June 2006
M T W T F S S
« May   Jul »
 1234
567891011
12131415161718
19202122232425
2627282930