Archive for April, 2006

InGeKuWa ViPi?!

Unadhani ingekuwa vipi?

Kama siku moja Mungu akiamua kuyafumua mapaa ya nyumba hapa duniani wakati wa usiku wa manane? Na unadhani ingekuwa vipi ikiwa katika hali ya nyumba hizo kuwa wazi kwa juu, Mungu akashusha nuru ya ghafla japo kwa dakika kama tano tu hivi kusudi muone kinachotokea ndani ya nyumba za watu usiku huo wa manane?

Ingekuwa vipi kama vijana wa Kitanzania wangeamua kwa dhati kabisa kuacha kushinda vijiweni wakikoka ganja na badala yake wakawa wanashinda katika viunga vya mahakama wakisikiliza uendeshaji wa kesi mbalimbali?

Ingekuwa vipi siku Sirikali ikiamua kuhalalisha bangi na kupiga marufuku sigara? Unadhani bei ya bidhaa hiyo ingekuwa kubwa na kuzidi kuwatajirisha wanaoifanya kwa kasi kubwa kiasi cha sasa?

Ingekuwa vipi Sirikali ingehalalisha Gongo na kupiga marufuku bia tulizozizoea kwa sasa? Unadhani vifo vinavyotokana na Gongo vingepungua kwasababu vingi vinatokana na wahusika kuinywa kwa kuikomoa kwakuwa kesho wanaweza kuja wakakuta mama muuza yuko Lupango?

Ingekuwa vipi kama Sirikali ingeamua kuwa kuanzia sasa mabadiliko yote yatakuwa yakifanyika kuanzia vijijini kuelekea mijini na sio kinyume chake? na unadhani Ingekuwa vipi kama leo nisingekuuliza Ingekuwa Vipi?…….. UTAJIJU!!

Advertisements

April 30, 2006 at 5:25 pm 8 comments

Mafanikio ya China na Azimio lililotelekezwa Tanzania

Nyerere once more opened his Arusha Declaration booklet, shook his head and muttered; “There is nothing wrong with this manifesto, why did the Tanzanian chose to trash it? Soon they will all be talking like Banana, Mobutu and Idi Amin ……….How I weep for the country!” – {Mtandao wa NTZ}
******************************
Kama kuna vitu ambavyo naamini kabisa kutoka sakafuni mwa moyo wangu, kuwa vingali vikimuumiza Hayati Baba wa Taifa, Mwalimu Julius Kambarage Nyerere, moyoni mwake, huko mahali pema peponi tunakoamini yupo, ni lile la Azimio la Arusha. Na ninaamini kabisa kuwa, angalikuwa hai hadi leo hii angalikuwa akilipigia chapuo Azimio hilo, tena basi akiwa na mifano hai.
Hivi karibuni, nilivutiwa na taarifa moja kuhusu ziara ya rais wa China, Hu Jintao, nchini Marekani. Pamoja na mambo mengine mengi aliyoyafanya rais huyo katika ziara hiyo, kama ilivyo ada, alilazimika kukutana na mwenyeji wake, ambaye ni rais wa Marekani, George .W. Bush, ambaye eti alimwomba Bw. Tao, kuangalia uwezekano wa nchi yake kupunguza baadhi ya bidhaa zake zilizoko katika soko nchini Marekani, (bilashaka na kwingine Duniani), kwakuwa eti zinadhoofisha ushindani wa kibiashara.
Awali nilicheka sana niliposikia taarifa hiyo, lakini baadae nililazimika kuitafakari kwa undani zaidi, kutokana na maswali kadhaa ambayo yalinijia kichwani. Marekani?, kuitaka China ipunguze bidhaa zake katika soko? Kwani waasisi wa sera ya soko huria walikuwa akina nani hasa humu duniani?
Kumbukumbu zangu (zinaweza kuwa finyu, hivyo wengine mnisaidie), zinaniambia kuwa, Wamarekani, kupitia viongozi wao ambao wanaamini kabisa kuwa waliletwa kuitawala Dunia, ndio walioasisi sera ya soko huria kwa minajili ya kuliteka somo la Dunia. kwa bidhaa zao ambazo kimsingi bei yake ni rahisi sana kwakuwa wanawapatia Wajasiriamali wao ruzuku. Ndesanjo, nadhani anaweza kulieleza hili zaidi. Inakuwaje leo hii wamezidiwa tena hadi kuanza kuwataka watu watoe bidhaa zao sokoni kwakuwa zinaua ushindani wa kibiashara?
Lakini swali kubwa zaidi ambalo lilinikuna kichwa ni kuhusu nguvu za Uchina katika soko la dunia hivi sasa, hadi kufikia kuwa Taifa linaloogopwa kiasi cha kuombwa kuanza kupunguza bidhaa zake sokoni (japo najua wakijitetea kuwa ni soko huria, Wamarekani hawatakosa ufa wa kuwabana kwa lengo la kuwadhoofisha, {washindwe na walegee}).
Enzi za uhai na uongozi wake, hayati Mwl. Julius Kambarage Nyerere, alikuwa mtu ambaye alipenda sana kuwajasirisha Watanzania, kwa kila mbinu ambayo aliona inafaa. Alipenda waungane, alipenda wawe na uhuru, alipenda wawe na maisha bora, ambayo msingi wake ulikuwa ni nguvu na umoja baina yao. Alifanya hivi kwasababu (naamini), alikuwa anajua wazi kuwa Watanzania wanaweza.
Kwa wote waliowahi kulipitia, kulichambua na kulichanganua Azimio la Arusha, naamini kabisa kuwa wataendelea kuwa upande wake kuwa Azimio lile lilikuwa na kila kitu kumwezesha Mtanzania kutembea kifua mbele sehemu yoyote duniani na akijivunia Utanzania wake. Naamini wote hao watakubaliana na ukweli kuwa endapo Azimio lile lingetekelezwa kikamilifu, leo hii Watanzania wangekuwa ‘wanakula sahani moja’ na Wachina katika nyanja mbalimbali.
Uelewa wangu katika kitabu kile, unaniambia kuwa, maandiko yaliyokuwemo ndani yake, yalikuwa yamelenga miaka mingi sana ya mbeleni, na bilashaka kutokuwa na mtazamo wa mbali ndio kilikuwa chanzo cha kulisaliti Azimio lile, ambalo daima Mwl Nyerere, alitembea nalo mkononi sanjari na kitabu chake cha dini. Alilifananisha na maandiko mengine matakatifu, kwakuwa tu alikuwa na uhakika kuwa, kilikuwa na uwezo wa kumfanya kila Mtanzania aishi maisha bora, kwa namna anayotaka na sio kwa masharti ya fulani.
Sina shaka kabisa kuwa, Azimio lile, licha ya kuwa lilitoka enzi zile bado tuko katika ukoloni uliotopea kwa uonevu, bado lilikuwa na kila mazingira ya kumwezesha Mtanzania aingie katika utandawazi na soko huria kwa hiari yake mwenyewe, sio kwa kulazimishwa au kutishiwa huku akinung’unika.
Wakati taifa hili linapata uhuru wake, waliokuwepo enzi hizo wanashuhudia kuwa China, ilikuwa miongoni mwa nchi masikini kabisa duniani, ikilinganishwa na yaliyokuwa mataifa makubwa kiuchumi enzi hizo, lakini China, ilijua kuwa yenyewe ni nchi, ina utamaduni wake, ina maamuzi yake, ina uwezo wake na zaidi ya yote iliamini katika uwezo wa kile ilichokuwa nacho.
Wachina, hawakuwahi kuitukuza lugha yoyote ya kigeni duniani, na hata bidhaa zao zote zina lugha ya kikwao, lakini Tanzania, naambiwa eti Kiswahili bado ni finyu sana kuweza kuifanya Tanzania kushindana na mataifa mengine kimaendeleo. Wachina (licha ya misukosuko yote iliyowakumba), bado ni nchi ambayo pamoja na mapungufu ya hapa na pale, walisimama kwa dhati kabisa kujenga uwezo wa watu wao na kuegemea katika ujamaa, kwa maana walijua hiyo ndio njia pekee ya kujenga, kudumisha na kuimarisha utaifa wao. Kwanini Tanzania tulishindwa?
Hivi sasa, wakati China ni miongoni mwa nchi zilizokuwa masikini ambazo zimeliona soko huria kama mkombozi kwao, kwakuwa wanazalisha bidhaa nyingi na kwa teknolojia rahisi, wakitumia Wajasiriamali wazalendo, Tanzania, ambayo hata utamaduni wake unaendelea kubomoka kwa kasi mpya, nguvu mpya na ari mpya, wanaendelea kusononeshwa na sera hizi za kidunia.
Hayati mwalimu Nyerere, aliwahi kunukuliwa akisema kuwa, dhambi ya kuua ni dhambi endelevu, ukiua leo kesho utajisikia tena kuua na keshokutwa na daima, lakini dhambi hiyo pia ni dhambi ambayo itakuhukumu daima dumu. Tulipolikataa Azimio la Arusha (ni kweli lilikuwa na mapungufu, lakini tulitakiwa kuliboresha sio kulizika), hatukuwa na tofauti ya mtu ambaye aliukataa utu wake, utamaduni wake, uwezo wake na kwa ujumla kujikataa mwenyewe.
Na kwa hakika, ikiwa hatatokea kiongozi wa kukubali kuugua mafua kwa kukisaka kile kijitabu kilikokuwa na akakikung’uta mavumbi, na akajitoa mhanga kuanza kukipenyeza katika fikra za Watanzania, tutaendelea kuamini kuwa tulizaliwa ili tuwe tunasaidiwa daima dumu. Hata Rwanda, Burundi, Somalia, Sudan, Kongo Kinshasa nk, ambako vita ni sehemu ya majukumu ya kila siku ya wakazi wake, tutawasuluhisha na kisha wageuke wafadhili wetu.
“Oh…..how I weep for my country!”

April 23, 2006 at 5:30 pm Leave a comment

Maisha Bora kwa kila Mtanzania, ndani ya siku 100 na ushee

Mpika-Kula, mwenye maskani yake katika kitongoji cha Chanji ndani ya Manispaa ya Sumbawanga, akiwa anatafakari ndoto za kuwa miongoni mwa Watanzania wanaotarajiwa kushirikishwa katika Mpango wa Maisha Bora kwa Kila Mtanzania

Maskani ya Wapika-Kula wengine ambao pia wanawazia Maisha Bora kwa Kila Mtanzania kama yalivyoahidiwa kwao na Sirikali yao ya awamu ya nne, chini ya mheshimiwa saaaaaaaana JMK

April 16, 2006 at 8:49 am 2 comments

Azimio la Dodoma na ujio wa Teknolojia mpya


Miongoni mwa mambo ambayo yamezungumzwa katika Azimio la Dodoma, ni pamoja na kupeana taarifa mbalimbali kuhusiana na teknolojia rahisi ambazo zitakuwa zikituwezesha kuzidi kusukuma mbele gurudumu la uandishi wa mtandaoni, na bilashaka kuzidi kutuunganisha. Nina furaha kuwaletea malezo kidogo juu ya mambo mapya ambayo naamini yanaweza kwa namna moja ama nyingine kuleta chachu ya kazi zetu.

SURA YA KITANZANIA:
Kwa kipindi kirefu kidogo (nadhani Ndesanjo na Mike, wanakumbuka hili), nimekuwa nikihangaika kujaribu kuona ni namna gani ambavyo sisi Watanzania ambao tunamiliki Blogi, au Magazeti Tando, tunakuwa walau na kitu ambacho kinatutambulisha na kutubainisha miongoni mwa wenzetu. Tuwe na Magazeti Tando ambayo yatakuwa na sura ya Rasilimali mbalimbali za Kitanzania. Nimekuwa na ndoto ya namna hii kwa muda mrefu sana, na nilishaijadili sana na Mike Mushi, na akaniahidi kuwa angeliifanyia kazi. Hata hivyo kabla Mike hajafikia hatua hiyo, napenda kuwaelezeni kuwa nimefikia ndoto hii tayari kwa msaada wa ndugu yetu MK, wa vijimambo.

Kupitia hali hii, ndio maana kwa wale wanaoingia kwangu hivi sasa na waliokuwa wakijua awali Jumba langu lilikuwa na sura gani, wataona mabadiliko, kadhaa ikiwa ni pamoja na picha za wanyama wetu, mlima wetu wa Kilimanjaro na ndugu zetu wa Kimasai wakisherehesha sura ya Jumba langu. (Makene, mshahara wangu naongeza kwa kuuza vitafunwa na barafu wakati wangu wa ziada). Kuna mengi ambayo yanaweza kufanyika kupitia hili na kwa wale ambao watakuwa na uhitaji wa kufanyia ukarabati majumba yao, naomba wasisite kuniandikia kwa anwani yangu hapo kulia, au wakawasiliana na MK, kwa anwani hii.

TAARIFA ZA UJIO WA KAZI MPYA:
Hii huduma niliibaini kupitia kwa ndugu yetu Ndesanjo, katika maskani yake mpya. Ni huduma ambayo inawawezesha wasomaji wako, kujiandikisha na kisha wakawa wanatumiwa taarifa juu ya wewe kupandisha kazi mpya katika Gazeti lako, kila mara unapofanya hivyo. Huduma hii inayowezeshwa na Mtandao wa FeedBlitz, ni huduma ambayo ingetufaa sote, hasa kwa kuzingatia ukweli kuwa katika mazingira ya kawaida, wengi wetu bado hatujawa na uwezo wa kuingia kwenye mikahawa ya Intaneti, na kuwa na muda wa kupitia Magazeti Tando yote ambayo tunayajua, kwa lengo la kujua kuna lipi jipya. Ni gharama kwakuwa huduma hiyo hutolewa kwa kulipiwa, na pia huduma zinazopatikana katika mikahawa mingi ni za kasi ya chini mno, hivyo itakuhitaji muda mrefu sana.

Kupitia huduma hii, ikiwa kila mwana-Mtandao wa Magazeti Tando, (ndio hata sisi tuna wanamtandao bwana, kwani wao wameweza wana nini hata sisi tushindwe tuna nini!!), atajiandikisha kwa huduma hii, na kisha akaweka kiungo chake katika Gazeti lake, itawawezesha wasomaji wetu kujiandikisha kwa ajili ya kujulishwa kila tuandikapo kazi mpya, na hivyo wasomaji watakuwa na urahisi wa kutembelea magazeti yale yatakayokuwa na habari mpya baada ya kujulishwa.

UKUMBI HURU WA MAJADILIANO:
Sina uhakika kama huduma hii inaweza kuwa ya manufaa saaana kwa kila mmoja wetu, ila naamini hivyo. Ni huduma ambayo inawezeshwa na mtandao wa TagBoard. Ni huduma ambayo inakuwezesha wewe kuwa na sehemu ambayo itawawezesha wasomaji wako kuweka maoni yao mpya au tuseme kubadilishana mawazo na wasomaji wengine kwa uhuru, kwa kujiandikisha tu majina yao na anwani zao.

Kuna jambo moja ambalo linanifanya niamini kuwa huduma hii pia ina umuhimu wa aina yake. Kuna baadhi ya nyakati mtu anaweza kuwa ama na salamu za kukutumia na akipenda wasomaji wengine wazione, lakini akakosa sehemu muafaka, matokeo yake analazimika kuingiza salamu zake kwenye maoni ya kazi fulani ambayo wala haihusiano na alichodhamiria kukisema. Kuna vitu kama makaribisho ya wageni wapya, ambao wengi hawaanzi na kazi za kuomba kukaribishwa, huanza na mambo mazito moja kwa moja, sasa tunawakaribishia wapi kama sio kupitia kazi zao hizo? Hili pekee ndilo linanifanya nione umuhimu pia wa huduma hizi.

HITIMISHO:
Kuna ugumu fulani katika kukamilisha huduma hizi, sio katika hatua za kujiorodhesha, bali katika hatua ya kuingiza vile viungo vya huduma hizo katika Gazeti Tando lako, ili kuiwezesha huduma hiyo kufanya kazi. Hata hivyo, kama ambavyo Azimio la Dodoma, linavyobainisha, ushirikiano ni kitu cha msingi kabisa, na ninawahakikishia wazi kuwa wapo watu ambao bilashaka wanafahamu kuhusu mambo haya zaidi yangu, ambao watakuwa tayari kuwapa mwongozo mzuri. Unaweza kuniandikia mimi kupitia anwani yangu hii, au kumwandikia Ndesanjo au Waziri Mteule wa sayansi na Teknolojia, ndugu yetu MK, ambaye anaweza kuongoza haya yote.

Makene na Miruko, kazi kwenu sasa.

April 12, 2006 at 10:18 am 6 comments

Siku 100 za staili ya MBWA (Management By Walking Around)

” Nionavyo mimi kama hakuna sababu ya kuyajua mabaya ya marehemu, pia hakuna sababu ya kuyajua mazuri yake” – R.S Miruko, akichangia Kumbukumbu ya Kionambali, kwenye kibaraza cha Boniphace Makene
*********************************

Nianze kwa kushusha pumzi kwanza kwasababu Tamthilia ile ilinichosha mno. Uhhhh!!!

Ilikuwa kama tamthilia ya kusadikika kwa hakika, tamthilia ambayo ingekufanya uamini kuwa, hatimaye maandiko yametimia juu ya ujio wa Yesu wa Nazareth ama Nabii Issa kama wengine wanavyomwita. Tena basi amefufukia nchini Tanzania.

Machi 30 mwaka huu, vyombo vya habari nchini Tanzania (sina uhakika na vile vya nje kwa maana sikuviona), vilichukulia siku hiyo kama siku ya aina yake (Sijui kwanini wale waheshimiwa fulani fulani hawakuomba iwe siku ya mapumziko). Kisa? Kutimia kwa siku 100 toka Jakaya Kikwete, aingie rasmi madarakani katika nafasi ya Urais wa Tanzania.

Mambo yaliyokuwa yameandikwa na namna yalivyokuwa yameandikwa au kutangazwa na vyombo hivyo vya habari, yalinikumbusha alichoandika Ndesanjo Macha juu ya vyombo vya habari vya hapa Tanzania. Soma alichoandika hapa. Na yalikuwa ni mambo ambayo yalinifanya nikumbuke masimulizi ya Tamthilia ya Kusadikika, kwa maana siamini kama yalikuwa na ukweli kwa asilimia 100 kama yalivyokuwa yameelezewa katika vyombo hivyo.

Magazeti, Redio na hata Luninga za nchi hii ambayo pia inaitwa Bongo, siku hiyo kwa pamoja vilikuwa na simulizi ya aina moja tu, kuzielezea siku hizo 100 kama siku za kipekee kuwahi kutokea Tanzania. Haiyumkiniki kuwa, watu kama akina Ndesanjo, makene, Damija, na wengineo ambao hawajakuwepo Tanzania katika kipindi hicho, ilikuwa ni rahisi sana kwao kuamini Yesu (Nabii Mussa) amefufuka. tena amefufukia nchini kwao na tayari ana siku 100 toka kufufukia kwake.

Nashindwa kusema kuwa yalikuwa ni masimulizi yaliyojaa unafiki (kwa mujibu wa maadili ya uandishi na umuhimu wa vyombo hivyo katika nyanja ya siasa kwa ujumla), kwasababu kilichokuwemo kilikuwa zaidi ya unafiki na ….. ndio, kwa kiasi kikubwa uongo pia. Vilizalisha makubaliano ya aina yake, kiasi cha kumfanya mtu wa nje aamini kuwa huenda siku hiyo, mamilioni ya Watanzania, walifurika mitaani kusherehekea siku 100 za miujiza ya aina yake.

Kwa bahati mbaya sana ni watu wachache wanaowezakiri kuwa Serikali hii imeweka mianya ya ya kuwezesha unafiki, kwa kuwaaminisha baadhi ya wananchi (na hususan walioko katika nafasi za kuzalisha makubaliano feki), kushika nyadhifa fulani fulani wakati wowote ule fulani akivurunda, hivyo kuasisi (japo sio rasmi) mashindano ya unafiki kila mmoja akitarajia kushinda na kuteuliwa miongoni mwa wateule siku yoyote

“Lakini bahati mbaya zaidi ni kuwa moja kati ya mitaji ya uhakika kabisa katika mradi wa siasa sehemu yoyote Duniani ni pamoja na Unafiki, na yeyote mwenye malengo ya kuwekeza katika biashara hiyo shuruti awe na mtaji huo. Usiseme ukweli daima, kuwa msanii daima ili kuwafurahisha watazamaji wako na hasa mmoja wapo anapokuwa ameahidi kuinua vipaji wakati wowote ili aweze kukuona na kukufikiria”

Kama utataka kupitia japo vichwa vya habari tu vya magazeti ya Tanzania siku hiyo, unaweza kushikwa na mshangao wa aina yake. – “Siku 100 za matumaini na mwanga mpya, siku 100 za mwelekeo wa matumaini, siku 100 za ukombozi, JK aitwa Nyerere” – Hivyo ni baadhi tu ya vichwa vya habari vya Habari siku hiyo, vichwa ambavyo kwa mara nyingine vilidhihirisha taaluma ya habari inavyokabiliwa na kirusi cha kujikomba, tena kwa watu ambao mwisho wa siku huidhalilisha taaluma hii kwa kuiponda na kuitupia kila aina ya kashfa. Ndio, wataachaje ilhali hata akitukana kesho bado atakuta mmemuandika kwa mazuri yake?

Kuna mambo mengi ya kimsingi yalizungumzwa siku hiyo ambayo naamini yalikuwa na ukweli ndani yake (kwasababu watu tunatofautiana katika kuchambua ukweli wa jambo), lakini pia kulikuwa na unafiki wa hali ya juu katika masimulizi hayo kwa kuacha kuchambua uhalisia wa mambo (sio ukweli). Kilichozungumzwa au kuandikwa kilikuwa kweli lakini sio halisi kwa mantiki ya hali halisi ilivyo hapa nchini.

Binafsi nilitarajia katika zama hizi ambapo vyombo vyetu vinajinadi kuwa vimepania kuleta mabadiliko ya kimaendeleo, kutuelezea mambo hayo kwa mchanganuo unaotuwezesha sisi wananchi kufahamu kama kweli siku hizo zimekuwa za ukombozi au laa.

Nilitarajia waandishi wa habari siku hiyo kutulinganishia idadi ya matukio ya ujambazi na uporaji katika siku hizi 100 na idadi matukio kama hayo wakati wa awamu7 zilizotangulia. Kwanza huu utamaduni wa kumpima mtu kwa siku 100 za awali ulianza lini kama sio ushabiki na unafiki wa kiwango cha juu ambao baadae utamalizikia kwa kusababisha maanguko? Kwanini hakupimwa katika siku 50 za mwanzo, kwanini zisiwe siku 150, 200 au hata 500?

Mbaya zaidi, habari nyingi ziliandikwa kutokea jijini Dar es salaam. Kama ilizidi hapo basi kulikuwa na Zanzibar labda na Mbeya. Hivi Wakazi wa dar es salaam na mikoa hiyo mingine miwili ndio wanatosha kuwa kielelezo cha Watanzania wanaokadiriwa kufikia milioni 40 kwa sasa? na je, ni kweli kuwa ulikuwa msimamo wa wakazi hao wa Dar es salaam, au ndugu zetu tunaoishi nao au maongezi ya kwenye vijiwe vya kahawa na stuli ndefu?

Kwa mtu aliyesoma kwa umakini habari zile, kuna baadhi ya nyakati atakubaliana nami kuwa maoni, mitizamo na mawazo yaliyokuwepo katika masimulizi yale hayakuwa ya Watanzania hawa walioko katika ukanda huu wa Afrika Mashariki. Hawakuwa Watanzania hawa ambao nchi yao ni miongoni mwa zinazounda hiki tunakiita Dunia, bali Wadanganyika ambao wanaishi katika Jamhuri moja iliyoko katika sayari ya Bongo na mitizamo ya Waandika habari”

Hivi ni kweli kulikuwa na matumaini kwa serikali iliyoahidi kutimiza ndoto ya makao makuu ya Nchi kwenda Dodoma, kwa kasi mpya, nguvu mpya na ari mpya, kuwajengea mawaziri wake nyumba za kuishi Dar? Za nini sasa wakati wanatakiwa kuhamia Dodoma? Au mwanga wa matumaini hapo uko katika ukweli kuwa licha ya kutumia mabilioni ya fedha za walalahoi wa Tanzania kujengea nyumba hizo, bado watatumia zingine tena kujenga mahekalu mengine Dodoma muda mfupi ujao?

Naambiwa kuwa hadi sasa kuna mawaziri ambao wakiwa Dar, wanakuwa wako nje ya vituo vyao vya kazi, kwahiyo wanalipwa marupurupu ya kuwa nje ya vituo vyao vya kazi. Je, matumaini yaliyopatikana katika hizi siku 100, ni kujua kuwa serikali itakuwa inamlipa waziri wake posho na marupurupu ya safari kwakuwa yuko nyumbani kwake? Tena katika nyumba ambayo amejengewa na serikali hiyo hiyo? na akija Dodoma kikao cha Bunge alale hoteli ya kifahari?

Mbona hamjatueleza gharama za utengenezaji wa nafasi milioni 1 za ajira alizoahidi kuwa hadi sasa zimekuwa kiasi gani, na walioajiriwa wameingiza kiasi gani? Ndio, si alianza kwa kuongeza mawaziri 15 katika baraza lake. Hawa walisababisha vitegemezi vingine kadhaa navyo kukwaa ajira katika ofisi nzuri nzuri walizotengewa, mafundi gereji nao bilashaka walijua kuongezeka kwa tenda feki za utengenezaji wa magari nao wakafikiria kutengeneza risiti hewa, wenye maduka ya “Stationeries” nao wakanufaika, wenye sheli wakaanza kunufaika nakadhalika. nafasi hizo zimegharimu kiasi gani kuzitengeneza?

Hivi ni kweli kuwa kiinimacho kilichopewa jina la “Mabadilioko ndani ya Jeshi” kimeleta mwanga huo wa matumaini ilhali kuna virusi kibao vya rushwa, uzembe kazini na tamaa ambayo vimesalia katika jeshi hilo? Na sisi sote tunajua wazi kuwa virusi hivi huwa vina nguvu kubwa kiasi cha kuweza kueneza sumu yake kwa muda mfupi sana, ikimaanisha baada ya muda huenda hali ikarejea pale pale ilipokuwa japo kwa staili nyingine lakini yenye ari mpya nguvu mpya na kasi mpya?

Nani alijadili hivi vitu vinaitwa semina au warsha elekezi ambavyo vilikuwa vikifanyika katika mahoteli ya kifahari, yenye kulipiwa mamilioni ya shilingi sanjari na mamilioni mengine kwa posho za wana warsha, ilhali serikali ina ukumbi mzuri tu wa pale Chimwaga Dodoma? Nani alihoji vikao vya wakubwa ambavyo walikuwa wanalipana posho za zaidi ya laki nne kwa siku huku vikifanyika katika hoteli za kifahari za mamilioni kwa siku ilhali wakubwa hao wana ukumbi wao na ofisi ambazo zimetumia mabilioni ya Watanzania katika kuziandaa?

Kwanini tusiwe kama Ndesanjo kuamini kuwa wametufanya sisi kama wanyama fulani katika mbuga ya wanyama na wao wamekuja kutuona, kwa jinsi wanavyoendesha mambo yao? Kuishi hoteli ya kifahari, kazi hoteli ya kifahari, usafiri wa kifahari, kuongea nako kwa ufahari, madai nayo ya kifahari….yaani kila kitu cha kifahari na haya yote yamejiri ndani ya hizo siku 100. hakuna aliyetueleza kuwa yamewagharimu Watanzania kiasi gani na kutuingizia faida ya kiasi gani.

Ndio, yote haya yametokea ndani ya siku 100 za sirikali ya awamu mpya, lakini nani kahoji? Ni nani amehoji mapato (makusanyo) ya sirikali ya awamu ya nne katika siku hizi 100 akalinganisha na hali ilivyokuwa katika sirikali zilizotangulia kisha akatuacha sisi tukakubali kuwa kweli tuko katika mwanga na tumaini jipya? Au mwanga wa matumaini ni kutembelea Kariakoo, kushikana mikono na wachuuzi kisha dakika tano baada ya yeye kuondoka bei za bidhaa zinapanda?

Au mwanga wa matumaini ni kufanya ziara za ghafla na za kushtukiza kwenye Wizara, kujua matatizo yaliyopo na siku chache baadae akinamama wakaandamana kwa mkuu wa mkoa kupinga kitendo cha wao kudhalilishwa katika hospitali fulani kana kwamba wao sio wakazi wa eneo ilipo hospitali hiyo na hawastahili kupata huduma mahali hapo? Eti ghafla na kushtukiza, kweli? Mlijuaje nyie kama ilikuwa ghafla? Hawakuwa wamendaa bahasha za khaki mlizokabidhiwa baada ya kumaliza safari hiyo ya ghafla? Huo ughafla ulitoka wapi hapo?

Mwanga wa matumaini unapatikana kwa bwana mkubwa kutumia siku moja kwa kuhudhuria kikao Dodoma, kisha mazishi Zanzibar na akarejea tena Dodoma kuhudhuria kikao na kupumzika Ikulu kwake pale Chamwino? Safari hiyo imezalisha na kutafuna kiasi gani cha fedha? nani alitueleza hili tukajua kweli tupo katika mawio ya matumaini? Hivi ni kweli kuwa wafanyibiashara walimpongeza jamaa alipokuwa akifanya bomoa bomoa pale jijini? Kwanini Mr. Edo (Waziri Mkuu), akasimamisha zoezi hilo kama lilikuwa linachekelewa?

Hivi uamuzi wa kuanza kutizama mikataba ile tuliyoambiwa ina utata uliishia wapi? Kwa maana tulitarajia kuwa masuala kama hayo yangepewa uzito katika hizi siku 100 za awali. Bado tunazidi kuumia kwa ule mkataba wa IPTL tena basi baadhi ya nyakati magazeti yakichelewa mitamboni sababu ya mgao wa umeme. nani kahoji mgao huu ilhaliu serikali ina mkataba wa mamilioni ya fedha na IPTL?

Au hatuyaoni haya kuwa yanazidi kutuumiza tena kwa kasi mpya, nguvu mpya na ari mpya? Hapana, tunayaona ila nani atathubutu kuhoji ilhali wengi wetu bado tunasubiria ukurugenzi wa halimashauri kadhaa ambazo tunazikodolea macho? Nani atahoji wakati mkubwa hajatangaza bado wakuu wa wilaya nasi huenda tunatarajia kuwa miongoni mwa wateule?

Lakini cha kufurahisha zaidi ni kuwa siku zote waandishi hatukosi cha kuandika. Tumefumbia macho masuala yote hayo, na badala yake tumeona hoja ya Mkapa kutangaza mali zake baada ya kutoka Ikulu kama ajenda muhimu sana. na hili limevaliwa njuga kweli kweli, tukimtaka jamaa JK amchunguze kaka Beni.

Wakati tunahangaikia mavi ya kale, huku yanaibuka mapyaaaaaaa!! Jamaa wanasaini mkataba wa aina yake wa kuleta wataalamu wa kufanya mvua zinyeshe, na baada ya miaka miwili tunakumbuka, he!! kumbe ule mkataba ulikuwa hauna maslahi yoyote.zaidi ya kuwa umeongeza donda katika kumbukumbu zetu.

Anyway, Hongera sana JK kwa kufikisha siku 100 na ushee toka uingie madarakani japo mimi sitarajii ipo siku tutashikana mikono maana nadhani kampeni yako huwa ni kuongea na Watanzania kupitia Wazee wetu walioko pale Daa-salamu au kule Idodomya.

Ni mtizamo tu…..Mnisamehe kama nimegusa Pabaya
Alamsiki

April 3, 2006 at 3:39 pm 11 comments


Blog Stats

  • 32,107 hits
April 2006
M T W T F S S
« Mar   May »
 12
3456789
10111213141516
17181920212223
24252627282930